नामपर अभंग वारकरी भजनी मालिका
204.नामपर अभंग
भजन – गोविंद राधे गोविंद । जय गोपाळ राधे गोविंद
1546.कामामाध्यें काम । काहीं
कामामाध्यें काम । काहीं म्हणा रामराम । जाईल भवश्रम । सुख होईल दुःखाचे ॥१॥ कळों येईल अंतकाळी । प्राण प्रयाणाचे वेळीं । राहाती निराळीं । रांडा पोरें सकळ ॥२॥ जीतां जीसी जैसा तैसा । पुढें आहेरे वोळसा । उगवूनी फांसा । काय करणें तें करी ॥३॥ केलें होतें याचि जन्में । अवघें विठोबाच्या नामें । तुका म्हणे कर्में । जालोनियां तरसी ॥४॥
1547.कळे न कळे ज्या धर्म
कळे न कळे ज्या धर्म । ऐका सांगतों रे वर्म । माझ्या विठोबाचे नाम । अट्टाहासें उच्चारा ॥१॥ तो या दाखवील वाटा । जया पाहिजे त्या नीटा । कृपावंत मोठा । पाहिजे तो चाळवळा ॥२॥ पुसतां चुका होतो वाटा । सर्वे बोळवा गोमटा । मोडों नेदी कांटा । घेऊं चुका चोरांसी ॥३॥ तुका म्हणे मोल नलगे । द्यावें वेंचा बोल । विठ्ठल विठ्ठल । ऐसा छंद मनासी ॥४॥
1548.पडतां जड भारी । दासीं
पडतां जड भारी । दासीं आठवावा हरी ॥१॥ मग तो होऊं नेदी सीण । आड घाली सुदर्शन ॥२॥ हरिनामाच्या चिंतनें । बारा वाटा पळती विघ्नें ॥३॥ तुका म्हणे प्राण । करा देवासी अर्पण ॥४॥
1549.ब्रम्हरस घेईं काढा । जेणें
ब्रम्हरस घेईं काढा । जेणें पीडा वारेल ॥१॥ पथ्य नाम विठोबाचें । आणिक वाचे न सेवीं ॥२॥ भाव रोगा ऐसे जाय । आणिक काय क्षुल्लकें ॥३॥ तुका म्हणे नव्हे बाधा । आणिक कदा भूतांची ॥४॥
1550.भक्तिभावें आम्ही बांधिलासे
भक्तिभावें आम्ही बांधिलासे गांठीं । सादावितों हाटी घ्यारे कोणी ॥१॥ सुखाचिया पेठे घातलें दुकान । मांडियेले वान रामनाम ॥२॥ सुखाचें फुकाचें सकळांचे सार । तरावया पार भवसिंधु ॥३॥ मागें भाग्यवंत झाले थोर थोर । तिहीं केला फार हाचि सांठा ॥४॥ खोटें कुडें तेथें नाहीं घातपात । तुका म्हणे चित्त शुद्ध तरी ॥५॥
1551.फलकट तो संसार
फलकट तो संसार । तेथें सर भगवंत ॥१॥ ऐसें जागवितों मना । सरसें जनासहित ॥२॥ अवघें निरसुनि काम । घ्यावें नाम विठोबाचें ॥३॥ तुका म्हणे देवाविण । केला सीण तो मिथ्या ॥४॥
1552.मुखीं नाम हातीं मोक्ष
मुखीं नाम हातीं मोक्ष । ऐसी साक्ष बहुतांची ॥१॥ वैष्णवांचा माल खरा । तुरतुरां वस्तूंसी ॥२॥ भस्म दंड नलगे काठी । तीर्थां आटी भ्रमण ॥३॥ तुका म्हणे आडकाठी । नाहीं भेटी देवाचे ॥४॥
1553.देवा ऐकें हे विनंति
देवा ऐकें हे विनंति । मज नको रे हे मुक्ती । तया इच्छा गति । हेंचि सुख आगळें ॥१॥ या या वैष्णवांचे घरीं । प्रेमसुख इच्छा करी । रिद्धी सिद्धी द्वारीं । कर जोडुनी तिष्ठती ॥२॥ नको वैकुंठींचा वास । असे तया सुखा नास । अदभुत हा रस । कथाकाळी नामाचा ॥३॥ तुझ्या नामाचा महिमा । तुज न कळे रे मेघश्यामा । तुका म्हणे आम्हां । जन्म गोड यासाठीं ॥४॥
संपूर्ण भजनी मालिका
अशौच सुतक विटाळ, आत्म्याचा प्रवास सूची, ग्रंथाचे प्रश्नोत्तरे, धर्म मार्ग, धार्मिक, नारी, स्त्री, स्त्रिया महात्म्य संपूर्ण, पाप कर्म कोणते, पितृकार्य, पौराणिक, प्रश्नोत्तर सूची, भगवान शंकर, भजनी मालिका, भागवत महापुराण सर्व, मृत्यूनंतर पुढे काय ?, वाचावे असे संपूर्ण सूची, वैदिक-हिंदू संस्कृती, शास्त्र असे सांगते, स्त्रियांची-लक्षणे, स्वप्न शास्त्र
आत्म्याचा प्रवास, मृत्यूनंतर पुढे काय ? सर्व भाग सूची
