संत निवृत्तीनाथ निवडक अभंग
संत निवृत्तीनाथ निवडक अभंग
रामनाम मुखिं तो एक
रामनाम मुखिं तो एक संसार । येऱ्हवीं अघोर नरक राया ॥१॥ संसार नरक रामनाम सार । तरले पामर पतित देखा ॥२॥ हरिनाम हेंचि शास्त्र पैं जयाचें । तयासी यमाचें भय नाहीं ॥३॥ अजामेळू नामें तरला पतित । नारायण त्वरित आले तेथें ॥४॥ उघडा मोक्षमार्ग गोविंद स्मरणें । रामनाम कीर्तनें मोक्षपद ॥५॥ निवृत्ती सतत रामनाम महिमा । अवघीच पूर्णिमा हरिपाठ ॥६॥
नित्य नाम वाचे तोचि एक
नित्य नाम वाचे तोचि एक धन्य । त्याचें शुद्ध पुण्य इये जनीं ॥१॥ रामनाम कीर्ती नित्यमंत्र वाचे । दहन पापाचें एका नामें ॥२॥ ऐसा तो नित्यता पढे तत्वनाम । नाहीं तयासम दुजें कोणी ॥३॥ निवृत्ती अव्यक्त रामनाम जपे । नित्यता तैं सोपें रामनाम ॥४॥
भाव भक्ती प्रेमा दया शांती
भाव भक्ती प्रेमा दया शांती क्षमा । अखंडित प्रेमा असो द्यावा ॥१॥ सर्वाभूतीं भजन करावें सर्वथा । रामनाम कथा आरंभाव्या ॥२॥ आपपर देहीं विचार करावा । हरिनामें दोहावा सर्वारूपीं ॥३॥ निवृत्तीचें जाप्य आनु नाहीं चितीं । रामनामें तृप्ति सदा असे ॥४॥
[…] संत निवृत्तीनाथ निवडक अभंग […]