ज्ञानेश्वर महाराज सार्थ गाथा अभंग क्र.321
👉 अभंग अनुक्रमणिका 👉 ग्रंथ सूची पहा.
ज्ञानेश्वर म. सार्थ गाथा, उपासना काण्ड.
प्रकरण :-८ वे, उपदेश अभंग ३२१
श्रुतीं सांगितले उपनिषदी अनुवादलें ।आम्हां लाधले निरूतें वर्म ॥ अनुभवे गोविंदु करितां अनुवादु । परब्रह्म आनंदु तरी ते नव्हे ॥ बोलिजें तें नव्हे दाविजे ते नव्हे । गुरूमुखी पाहावें परमानंदे ॥ अरूप परी बरवे दिसे । भीतरी कैसे विनवीतुसे ॥ अनुभविया प्रति बोलिजे लक्षण । ज्ञानदेवे खूण सांगितली ॥
अर्थ:-
श्रुतीने सांगितले असून उपनिषदाने अनुवाद केलेले ब्रह्मप्राप्तीचे वर्म आम्हाला चांगल्या रितीने प्राप्त झाले. सगुण गोविंदाचा अनुभव घेऊन अनुवाद करतो परंतु शुद्धब्रह्माचा अनुवाद करता येत नाही? व त्यास दाखविताही येत नाही. असे जरी आहे तरी रूप ब्रह्म गुरूमुखानेच समजून घ्यावे ते स्वरूपतः अरूप असले तरी सगुणरुपात फार चांगले दिसते. अशी त्याच्या स्वरूपाची अंतखूण आहे. या खुणेचा अनुवाद अनुभवी लोकांना विनंती करून मी सांगत आहे. असे माऊली ज्ञानदेव सांगतात.