3.
जरी तुज देवाची चाड । तरी न करी बडबड ।
बहुत बोलता वाड । पडसी पतनी ॥१॥
जरी तुज देवाची बाधा । तरी न करी वेवादा ।
वाद करिता निंदा । घडती दोष ॥२॥
जरी तुज देवाचा छंद । तरी सांडी कामक्रोध ।
तेणे परमानंद । होउनी ठासी ॥३॥
जरी तुज देवचि व्हावा । तरी मौन धरी पा जिव्हा ।
जेणे तू अनुभवा । पावसील ॥४॥
जरी तुज देवाचा सांगात । होता अखंडित ।
तरी बैस पा निवांत । साधुसंगी ॥५॥
जरी तुज देवाचा विश्वास । तरी हृदयी धरी नागेश ।
म्हणे कान्हो पाठक । अरे जना ॥६॥