379.
तुझे थोर थोर । भक्त करिती विचार ॥१॥
जपतपादि साधने । मज चिंतवेना मने ॥धृपद॥
करुणावचने । म्या भाकावी तुम्हा दीने ॥२॥
तुका म्हणे घेई । माझे थोडे फार ठायी ॥३॥

अर्थ :
अहो देवा तुमचे थोर भक्त तुमच्या स्वरूपाचा विचार करतात. आणि जप, तप इत्यादी साधनेही ते करतात. पण मी इतका अज्ञ आहे की माझे मन त्या साधनांचा विचारसुद्धा करू शकत नाही. मी सर्व बाबतीत अतिशय दुबळा आहे. म्हणून मला ऐवढेच कळते कि, काकुळतीस येऊन केवळ तुमची प्रार्थना करावी. तुकाराम महाराज म्हणतात अहो देवा, मज कडू जी काही थोडी फार वेडीवाकडी सेवा होत असेल, तिचा आपण स्वीकार करावा.