3040.
अनाथ परदेशी हीन दीन भोळे । उगलेंचि लोळे तुझे रंगी ॥१॥
आपुले म्हणावे मज नुपेक्षावे । प्रेमसुख द्यावे मायबापा ॥धृपद॥
कासवीचे परि दृष्टी पाहे मज । विज्ञानी उमज देवुनिया ॥२॥
तुका म्हणे तुझा झालो शरणागत । काया वाचा चित्त दुजे नाही ॥३॥

अर्थ :
मी अनाथ परदेशी हीन दीन भोळा भक्त आहे उगाचच तुझ्या रंगामध्ये देवा मी लोळत आहे. त्यामुळे हे मायबापा मी कसाही असलो तरी देखील तू मला आपले म्हण माझी उपेक्षा करु नकोस आणि तुझे प्रेमसुख तू मला दयावे. देवा तू कासवीच्या कृपादृष्टीप्रमाणे माझ्याकडे पाहावे व माझी भूक तृप्त करावी आणि तुझा प्रत्येक साक्षात्कार मला येऊ दयावा. तुकाराम महाराज म्हणतात, देवा मी तुला शरण आलो आहे आणि माझ्या कायावाचामनामध्ये तुझ्यावाचून दुसरे काहीच नाही.