3039.
आइके नारायणा वचन माझे खरे । सांगतो निर्धारे तुजपासी ॥१॥
नाही भाव मज पडिली लोककाज । राहिलेसे काज तुझे पायी ॥धृपद॥
वरदळ भक्ती करितो मी नित्य । परी नाही चित्त तुझे पाई ॥२॥
जरि तुज काही करणे उचित । तारी तू पतित तुका म्हणे ॥३॥

अर्थ :
हे नारायणा मी तुझ्याजवळ निर्धाराने एक खरे खरे वचन सांगतो ते तू ऐक. देवा माझा तुझ्याविषयी खरा भक्तीभाव नाही मला तर लोकलज्जा आडवी येत आहे परंतू माझे सर्व कार्य तुझ्या पायाजवळच राहिले आहे. परंतू देवा तरी देखील मी दांभिकपणाने तुझी भक्ती नित्य करीत असतो. असे असले तरी माझे चित्त काही तुझ्या पायाच्या ठिकाणी राहात नाही. तुकाराम महाराज म्हणतात, देवा जर तुला काही उचित करावेसे वाटले तर या पतिताला तू तार.