2644.
केले तुवा काय जाऊनिया तीर्था । सर्वदा विषयार्था भुललासी ॥१॥
मनींची ती पापें नाही धोवियेली । वृत्ति हे लाविली संसारींच ॥२॥
तीर्थस्नानें अंग तरी शुद्ध केले । नाही धोवियेलें अंतरासी ॥३॥
वरी दिससी शुद्ध अंतरी मलीन । तोवरीं हे स्नान व्यर्थ होय ॥४॥
तीर्थयात्रायोगें कीर्तिही पावली । बुद्धि शुद्धि झाली नाही तेणे ॥५॥
शांति क्षमा दया नाही पै अंतरी । वाया येरझारी कष्ट केले ॥६॥
एका जनार्दनी सद्‌गुरु पाय धरी । शांतीचे जिव्हारीं पावशील ॥७॥