1979.
साहोनि टांकीघाये । पाषाण देवचि जाला पाहे ॥१॥
तया रीती दृढ मन । करी साधाया कारण ॥धृपद॥
बाण शस्त्र साहे गोळी । शुरा ठाव उंच स्थळी ॥२॥
तुका म्हणे सती । अग्न न देखे ज्या रीती ॥३॥

अर्थ :
अनेक टाक्यांचे घाव सोसून दगडाचा देव झाला तो पहा. त्याप्रमाणे तू हे आपले साधन साध्य करून घेण्यासाठी मन दृढ कर. बाण, शस्त्र, गोळी यांचा त्रास सहन करूनच शूर शिपाई उच्चपदाला प्राप्त होतो. तुकाराम महाराज म्हणतात ज्याप्रमाणे सती चाललेली स्री अग्नी कडे पाहत नाही त्याप्रमाणे खऱ्या साधकाने दुष्ट लोकांच्या नींदे कडे लक्ष देऊ नये.