1605.
पवित्र ते अन्न । हरीचिंतनी भोजन ॥१॥
येर वेठया पोट भरी । चाम मसकाचे परी ॥धृपद॥
जेऊनि तो धाला । हरीचिंतनी केला काला ॥२॥
तुका म्हणे चवी आले । जे का मिश्रित विठ्ठले ॥३॥

अर्थ :
हरिचिंतन चालू असताना जे अन्नसेवन केले जाते ते अन्न पवित्र आहे. हरिचिंतन केल्याशिवाय अन्न भक्षण करणे म्हणजे ते चामड्याच्या पिशवीत काहीतरी भरावे असेच होते. हरिचिंतन करता करता अन्नाचा काला करूनच जो जेवण करतो तो खरा तृप्त होतो. तुकाराम महाराज म्हणतात भोजन करताना विठ्ठल नाम घेतले तर त्या अन्नाला मोठी गोडी येते.