545.
देवाधिदेवा सर्वत्रांच्या जीवा |ऐके वासुदेवा दयानिधी ॥१॥
ब्रह्मा आणि इंद्रा वंद्य सदाशिवा | ऐके वासुदेवा दीनबंधू ॥२॥
चवदा लोकपाळ करिती तुझी सेवा | ऐके वासुदेवा कृपासिंधू ॥३॥
योगियांचे ध्यानी नातुडसी देवा | ऐके वासुदेवा जगद्गुरू ॥४॥
निर्गुण निराकार नाही तुज माया | ऐके कृष्णराया कानडीया ॥५॥
वेडा अविचारी करी मजवर दया | ऐके कृष्णराया शहाणिया ॥६॥
करुणेचा पर्जन्य शिंपी मजवरता या | ऐके कृष्णराया गोजिरिया ॥७॥
नामा म्हणे जरी दाविसील पाया | तरी वदावया स्फूर्ति चाले ॥८॥