2071.
उभाउभी फळ । अंगी मंत्राचे या बळ ॥१॥
म्हणा विठ्ठल विठ्ठल । गोड आणि स्वल्प बोल ॥धृपद॥
कळी काळाची बाधा । नव्हे उच्चारिता सदा ॥२॥
तुका म्हणे रोग । वारे भवाऐसा भोग ॥३॥

अर्थ :
विठ्ठल या मंत्रामध्ये अशी शक्ती आहे की ते आपल्याला तात्काळ कोणतेही फळ मिळवुन देते. त्यामुळे तुम्ही विठ्ठल विठ्ठल असा मंत्र जप करा तो अतिशय गोड आणि सोपा मंत्र आहे. विठ्ठल या मंत्राचा जप आपण सदासर्वकाळ केला तर कळी काळाची बाधा आपल्याला केव्हाच होत नाही. तुकाराम महाराज म्हणतात या मंत्राने भवसागरातील सर्व रोग नाहीसे होतात केवळ तुम्ही विठ्ठल विठ्ठल मंत्र जपत रहा.