2275.
इतुले करी देवा ऐके हे वचन । समूळ अभिमान जाळी माझा ॥१॥
इतुले करी देवा ऐके हे गोष्टी । सर्व समदृष्टी तुज देखे ॥धृपद॥
इतुले करी देवा विनवितो तुज । संत चरणरज वंदी माथा ॥२॥
इतुले करी देवा ऐके हे मात । हृदयी पंढरीनाथा दिवसरात्री ॥३॥
भलतिया भावे तारी पंढरीनाथा । तुका म्हणे आता शरण आलो ॥४॥

अर्थ :
देवा मी काय म्हणतो ते आईक आणि तेवढे मात्र कर माझा अभिमान समूळ जाळून टाक. देवा मी तुला एक गोष्ट सांगतो तेवढी तु कर मला सर्वत्र समदृष्टी देऊन मी तुला सर्वत्र पाहीन असे कर. देवा मी तुला एक विनंती करत आहे तेवढी तु पूर्ण कर ती म्हणजे संतचरणरज माझ्या माथ्याला लावून मी त्याला वंदन करावे. हे देवा तु एवढे कर माझे एवढे बोलणे तु ऐक ते म्हणजे तु स्वतः पंढरीनाथ माझ्या हृदयात रात्रंदिवस राहावे. तुकाराम महाराज म्हणतात हे पंढरीनाथा तु मला आता कोणत्याही पद्धतीने या भवसागरातून तार.