2274.
फुकाचे ते लुटा सार । व्हा रे अमर सदैव ॥१॥
नाही गर्भवास पुढती । डोंगर जळती दोषाचे ॥धृपद॥
उदंड भावे उदंड घ्यावे । नाम गावे आवडी ॥२॥
तुका म्हणे घरिच्या घरी । देशा उरी न सीणीजे ॥३॥

अर्थ :
फुकटचे आणि सर्व साधनांचे ही सार असे नाम तुम्ही तुम्हाला हवे तेवढे लुटा आणि सदैव हरी सारखे अमर व्हा. त्यामुळे तुम्हाला पुढे गर्भवास होणार नाही आणि सर्व दोषाचे डोंगर जळून जातील. भरपूर भक्तिभावाने भरपूर हरीचे नाम घ्यावे आणि जमेल तर हरीचे नाम आवडीने गावे. तुकाराम महाराज म्हणतात नाम घेतल्याने सर्व लाभ आपोआप घरच्या घरी चालत येतात त्याकरता देशभर फिरण्याची गरज नाही त्रास करून घेऊ नये.