1833.
वटवट केली । न विचारिता मना आली ॥१॥
मज कराल ते क्षमा । कैसे नेणो पुरुषोत्तमा ॥धृपद॥
उचित न कळे । जिव्हा भलतेचि बरळे ॥२॥
तुका म्हणे काही । लौकिकाची चाड नाही ॥३॥

अर्थ :
देवा मी मनात कोणत्याही प्रकारचा विचार न करता जसे मनाला येईल तसे तुमच्यासमोर बडबड केली आहे. आणि हे पुरुषोत्तमा मी केलेल्या अपराधाबद्दल तुम्ही मला कशाप्रकारे क्षमा कराल ते मला काहीच कळत नाही. माझ्या जिभेला उचित काय अनुचित काय हे काहीच कळत नाही ती भलतेच काहीतरी बडबड करत असते. तुकाराम महाराज म्हणतात देवा आता मला लौकिकाची चाड किंवा लाज अजिबात राहिलेली नाही.