323.
वंदोनी श्रीकृष्‍ण चरण । हरुषे घाली लोटांगण ॥1॥
म्हणे तूचि माझ्या मना । स्वस्थ करी गा नारायणा ॥2॥
आश्रमासी येता ऋषी । तोवरी आयुष्य प्राणासी ॥3॥
ऐकताचि हांसे देव । नदिसे प्राप्तीचा उपाव ॥4॥
अवकाळी कैचे अन्न । विचारिता दिसे विघ्न ॥5॥
त्यांचे असो बळ तैसे । काही वोपावे आम्हास ॥6॥
स्वस्थ नव्हे माझे मन । क्षुधा लागली दारुण ॥7॥
ताटी विस्तारिला मेवा । तुझा ऐकोनिया धावा ॥8॥
न जेविता आलो येथे । बहु झालो क्षुधाक्रांत ॥9॥
सत्वर मेळवी भोजनी । म्हणे नामयाची जनी ॥10॥