1004.
ॐ नमोजी सदाशिवा । ब्रह्मादिकांन कळे लाघवा । तुम्ही स्वामी देवाधिदेवा । ध्यान करितासां कवणाचें ॥१॥
ऐक रमणीय पार्वती त्रैलोक्यांत ज्याची कीर्ति । पुराण वेद जया वानिती । तो श्रीपती ध्योती मी ॥२॥
आवड कीर्तन चित्ती । रंगी नाचतो जया वैकुंठपति । माझी धांव तेथे निश्चिती । ते सुखविश्रांती काय सांगूं ॥३॥
भाळे भोळे हरीचे दास । कीर्तनरंगीं नाचती उदास । त्यांच्या भार वाहें मी सर्वेश । उणे तयांस येऊ नेदी ॥४॥
ऐसा अनुवाद कैलासगिरीं । गिरिजेसी सांगे त्रिपुरारी । एका जनार्दनी सत्य निर्धारी । कीर्तनगजरीं उभे तिन्ही देव ॥५॥