3544.
अजानवृक्षांची पाने जाण । जो भक्षून करील अनुष्ठान । त्यासी साध्य होईल ज्ञान । येथे संशय नाही ॥१॥
ज्ञानेश्वरी तीन सप्तकें । जो श्रवण करील विवेके । तो होय ज्ञानी अधिकें । येथे संशय नाही ॥२॥
मणिकर्णिका भागीरथी । इंद्रायणीचे स्नान करिती । ते मोक्षपदासी जाती । येथे संशय नाही ॥३॥
अश्वत्थ सिध्देश्वर । समाधीसी करी नमस्कार । तो पावे मोक्ष पै सार । येथे संशय नाही ॥४॥
येथींचे वृक्षपाषाण । ते अवघे देव जाण । म्हणे एका जनार्दन । येथे संशय नाही ॥५॥