2116.
मज नाही धीर । तुम्ही न करा अंगीकार ॥१॥
ऐसे पडिले विषम । बळी देवाहूनि कर्म ॥धृपद॥
चालो नेणे वाट । केल्या न पवाची बोभाट ॥२॥
वेचो नेणे जीवे । तुका उदास धरिला देवे ॥३॥

अर्थ :
देवा तुम्ही आज पर्यंत माझा अंगिकार केला नाही त्यामुळे आता मला धीर धरवत नाही. मला एक गोष्ट कळत नाही की देवापेक्षा बलवान माझे संचित कर्म झाले आहे की काय हेच मला समजत नाही. मी या परमार्था च्या मार्गने व्यवस्थित चालू शकत नाही आणि तुमच्या नावाने मोठ्याने आरोळ्या जरी दिल्या तरी तुम्ही माझ्याकडे धाव घेत नाहीत. तुकाराम महाराज म्हणतात माझ्या जीवाचा उपयोग देवाच्या कार्‍यासाठी कसा करावा हेच मला समजत नाही आणि त्यामुळेच देवाने माझ्या विषयी उदासीनता धरली आहे असे मला वाटते आहे.