3528.
सांगा दास नव्हे तुमचा मी कैसा । ऐसे पंढरीशा विचारूनि ॥१॥
कोणासाठी केली प्रपंचाची होळी । या पाया वेगळी मायबापा ॥धृपद॥
नसेल तो द्यावा सत्यत्वासी धीर । नये भाजू हीर उफराटे ॥२॥
तुका म्हणे आम्हा अहिक्य परत्री । नाही कुळगोत्री तुज विण ॥३॥

अर्थ :
हे पंढरीराया मी तुमचा दास कसा नाही याचे तुम्ही विचार करुन उत्तर दयावे. हे मायबापा मी माझ्या संसाराची होळी केली ती कोणासाठी तुमच्या पायापेक्षा वेगळी माझी इच्छा कोणती दुसरी आहे काय ? देवा आम्ही सत्यकर्म करतो तर आम्ही सत्यकर्म करत असताना तुम्ही आम्हाला धीर दयावा. उलट धान्य भाजून ते जसे निर्बीज होते तसे तरी करु नये. तुकाराम महाराज म्हणतात, देवा तुझ्यावाचून आम्हाला इहलोकात व परलोकात कोणीही कुळ व गोत्र नाही.