3527.
आहे तेचि पुढे पाहो । बरे आहो येथेंचि ॥१॥
काय वाढवूनि काम । उगाच श्रम तृष्णेचा ॥धृपद॥
स्थिरावता ओघी बरे । चाली पुरे पडेना ॥२॥
तुका म्हणे वळिता मन । आम्हा क्षण न लगे ॥३॥

अर्थ :
आम्ही आता ज्या स्थितीत आहोत त्याच स्थितीत समाधान मानू पुढे कसे होईल याचा विचार करणार नाहीत. उगाचच इच्छेची तहान वाढवून व्यर्थ श्रम का वाढवावे ? ओघामध्ये स्थिर उभे राहाणे हेच चांगले उगाच वाहात जाणे हे योग्य नाही. तुकाराम महाराज म्हणतात, इच्छेच्या तृष्णेपासून मनाला वळवण्यासाठी आम्हाला एक क्षण देखील लागणार नाही.