3437.
(व्यभिचारिणी स्त्रीचे रूपक)
आजिवरी तुम्हा आम्हा नेणपणे । कौतुके खेळणे संग होता ॥१॥
आता अनावर झालो अगुणाची । करू नये तेचि करु सुखे ॥२॥
तुका म्हणे आता बुडविली दोन्ही । कुळे एक मनी नारायण ॥३॥

अर्थ :
(महाराजांची बुध्दी कृष्णरुपामध्ये इतकी तल्लीन झाली की ते म्हणतात)अहो सासुरवाशीणी बयांनो आजवर आपण अज्ञानामध्ये संसाराचा खेळ एकमेकांसोबत कौतुकाने खेळत होतो. आता आम्ही त्रिगुणरहित झालो आहोत त्यामुळे अनावर म्हणजे मुक्त झालो आहोत आणि जे कोणीही करु शकत नाही ते आम्ही सुखाने करु. तुकाराम महाराज म्हणतात, मी आता आई आणि वडिल या दोन्हीही कुळाला बुडविले आहे आणि एक नारायणच मनामध्ये दृढ धरला आहे.