988.
वेदध्वनि केलिया मुनी | गंधर्वगायने होती गगनी | ब्रह्मादिक इंद्र विमानी | इंद्रायणी ज्ञानदेवी ॥१॥
लागलिया मंगळतुरे ध्वनि | तीर्थे उभी असती कर जोडुनी |विठ्ठलदेव ज्ञान संजीवनी |नयनी न्याहाळिती ॥२॥
राही रखुमाई माता | सत्यभामा गोपी समस्ता | आरतिया ओवाळिती निभ्रांता | ब्रह्म त्वरिता ज्ञानदेवा ॥३॥
देवॠषिगण सकळ | जयजयकार ध्वनि मंजुळ | स्तुतिस्तोत्रे सकळ | नक्षत्रादिक गाती ॥४॥
वरूषति दिव्यसुमने | निव्रुत्तिसोपान नारायणे | संमोखिले संजीवने | नित्य पारणे हरिपाठे ॥५॥
परिसा भागवत डुलत | विठ्ठली झाला क्रुतक्रुत्य | नामा असे शोकाकुलित |चरणी रत विठ्ठलाचे ॥६॥
शेज घालुनी सुमनी | विठ्ठल पाहे रुक्मिणी | ज्ञानदेवाचे गुण मनी | आठवती म्हणे हरी ॥७॥
नामा जाला भयभीत चित्ते | ज्ञानासारखे रत्न मागुते | न देखो ऐसे विठ्ठलाते | पुसे त्वरित रुक्मिणी ॥८॥