1482.
मज तयांची आवड । पुरवणे लागे त्याचे कोड । गर्भवास सांकड । तयालागी उद्धवा ॥१॥
घेऊनी अवतार । करी दृष्टांचा संहार माझा हा बडिवार । तयाचेनि उद्धवा ॥२॥
माझे जप तप अनुष्ठान । देव पूजा मंत्र पठण । नाना नेमादि साधन । संत माझे उद्धवा ॥३॥
मज आणिले नामरुपा । त्याची मजवर कृपा । दाविला हो सोपा । मार्ग मज उद्धवा ॥४॥
माझा योगयाग सर्व । संत माझे वैभव । वैकुंठादि राणीव । तयाचेनि मज उद्धवा ॥५॥
ऐसे वरिष्ठ पावन । पुनीत केले मजलागून । एका जनार्दनी शरण । तयांसीच उद्धवा ॥६॥