4012.
आरुष शब्द बोलो मनी न धरावे काही । लडिवाळ बाळके तूचि आमुचि आई ॥१॥
देई गे विठाबाई प्रेमभातुके । अवघिया कवतुके लहाना थोरा सकळा ॥धृपद॥
सांडुनिया भीड धीटपणाते वाणी । घेतले पाहीजे केले लेकुरे ते कानी ॥२॥
तुका म्हणे थोडयासाठी काशाची अटी । झाली असे भेटी धुरे संवसाटी ॥३॥

अर्थ :
देवा आम्ही जरी वेडीवाकडी शब्द तुझ्याशी बोललो तरी तू आमच्या बद्दल काहीही मनामध्ये धरू नकोस कारण आम्ही तुझी लडिवाळ लेकरे आहोत आणि तू आमची आई आहेस. त्यामुळे हे विठाबाई माऊली तू तुझा प्रेमाचा खाऊ आम्हाला सर्व लहान थोरांना मोठ्या कौतुकाने द्यावा असे वाटते. देवा तुझी भीड टाकून देऊन मी तुझे वर्णन अगदी धीट पणाने केले आहे तू तुझ्या लेकरा ने केलेले वर्णन तुझ्या कानाने ऐकले पाहिजे किंवा ऐकून घेतले पाहिजे. तुकाराम महाराज म्हणतात देवा तुझ्यासारख्या श्रेष्ठ देवाची मला भेट झाली आहे मग मला तुझे वर्णन करता येत नाही या थोड्याशा कारणासाठी का बरे तू मला दूर लोटतो माझा तू स्वीकार कर आणि मला या संसारातून मुक्त कर.