4079.
यत्न आता तुम्ही करा । मज दातारा सत्तेने ॥१॥
विश्वास तो पायावरी । ठेवुनि हरी राहिलो ॥धृपद॥
जाणतचि दुजे नाही । आणीक काही प्रकार ॥२॥
तुका म्हणे शरण आलो । नेणे बोलो विनविता ॥३॥

अर्थ :
हे दातारा आता तुम्ही तुमच्या सत्तेने माझे रक्षण करण्याचे प्रयत्न करा. हे हरी तुमच्या पायावर मी विश्वास ठेवलेला आहे. देवा तुमच्यावाचून दुसरा कोणताही प्रकार मी जाणत नाही. तुकाराम महाराज म्हणतात, देवा मी तुम्हाला शरण आलो आहे दुसरे काहीही मी बोलत नाही केवळ माझे रक्षण करा एवढी एकच विनंती तुम्हाला करत आहे.