3.
गणेश नमू तरी तुझाचि नाचणा । म्हणोनि नारायणा नमन तुज ॥१॥
सारजा नमू तरी ते तुझी गायनी । म्हणोनि चक्रपाणी नमन तुज ॥२॥
ब्रह्मा नमु तरी तो तुझिये कुशी । म्हणोनी हृषीकेशी नमन तुज ॥३॥
शंकर नमू तरी तो तुझी विभूति । म्हणोनि कमळापति नमन तुज ॥४॥
वेद नमू तरी तुझाचि स्थापिता । म्हणोनि लक्ष्मीकांता नमन तुज ॥५॥
इंद्र नमु तरी तुझिया त्या भुजा । म्हणोनि अधोक्षजा नमन तुज ॥६॥
गंगा नमू तरी ती तुझे अंगुष्ठी । म्हणोनि जगजेठी नमन तुज ॥७॥
लक्ष्मी नमु तरी ते तुझे पायातळी । म्हणोनि वनमाळी नमन तुज ॥८॥
नामा म्हणे भेटी जाहली पै राया । कोण गणी बाया सेवकासी ॥९॥