391.
हरिभक्त निंदक जन्मले एके ठायी ।
वाटा तया पाही भागा आला ॥१॥
ज्याचे कर्म त्याने केलेचि पाहिजे ।
न करिता सहजे दोष होती ॥२॥
म्हणोनि निंदके निंदाचि करावी ।
तयासी तोचि जीवी आठो असे ॥३॥
हरिभक्ते भजन करावे आदरे ।
संतांची सादरे पूजा कीजे ॥४॥
कावळ्याचा धर्म टोचावे ढोपरा ।
मौक्तिकाचा चारा काय त्यासी ॥५॥
श्वानाचा स्वभाव गुरगुर करावी ।
पिसाळल्या जीवी प्राण घ्यावा ॥६॥
हंसाचा स्वभाव पय-पाणी निवडी ।
विष्ठा तो चिवडी काय घडे ॥७॥
बहेणि म्हणे तैसे ज्याचे कर्म तेणे ।
करावे म्हणणे न लगे तया ॥८॥