2551.
विनवितो शेवटी । आहे तैसे माझे पोटी ॥१॥
कंठी राहावे राहावे । हेचि मागतसे भावे ॥धृपद॥
पुरली वासना । येणे होईल नारायणा ॥२॥
तुका म्हणे जो देहाडा । तोचि वर्णीन पवाडा ॥३॥

अर्थ :
देवा माझ्या अंतःकरणात जे आहे त्यासंबंधी आता मी तुम्हाला शेवटची विनंती करीत आहे. कंठामध्ये तुमचेच नांव राहावे हेच मागणे मी तुम्हाला भक्ती भावपूर्वक मागत आहे. हे नारायणा ज्यावेळी असे होईल त्यावेळी माझी इच्छा वासना पूर्ण होईल. तुकाराम महाराज म्हणतात जोपर्यंत हा देहाचा सांगाडा आहे तोपर्यंत तुमचा पोवाडा तुमची कीर्ती वर्णन करीत आहे.