493.
दंभे कीर्ती पोट भरे मानी जन । स्वहित कारण नव्हे काही ॥१॥
अंतरती तुझे पाय मज दुरी । धरिता हे थोरी जाणिवेची ॥धृपद॥
पिंडाच्या पाळणे धावती विकार । आहे दावेदार मजमाजी ॥२॥
कैसा करू घात आपुला आपण । धरूनि गुमान लोकलाज ॥३॥
तुका म्हणे मज दावी तो सोहोळा । देखे पाय डोळा तुझे देवा ॥४॥

अर्थ :
दांभिक वृत्तीने किर्ती होते पोट भरते जनमानसामध्ये मान-सन्मान मिळतो परंतु दांभिकपणा स्वहित होत नाही. मी मोठा जानता आहे, असा अभिमान धरला तर तुझ्या चरणांचा वियोग होतो. या शरीराचे पालन-पोषण केले तर यामध्ये अनेक प्रकारचे विकार असतात ते बळावले जातातआणि सर्व विकार माझे दावेदार आहेत परमार्थ करण्यासाठी यांचा विरोध असतो. लोकांची पर्वा करून संसारकरून मी आपला घात कशाला करून घेऊ ? तुकाराम महाराज म्हणतात तू अशी युक्ती कर की मी तुझे पाय पाहीन.