2736.
समर्थाचे बाळ पाघरे वाकळ । हसती सकळ लोक कोणा ॥१॥
समर्थासी लाज आपुल्या नावाची । शरण आलियाची लागे चिंता ॥२॥
जरी तुज काही होईल उचित । तरी हा पतित तारी तुका ॥३॥

अर्थ :
समर्थ माणसाचे बाळ जर वाकळे पाघरु लागले तर लोक कोणाला हसतील ? समर्थाला आपल्या नावाला कोणत्याही प्रकारचा डाग लागू नये याविषयी लाज धरावी लागते आणि त्याला शरण आलेल्या व्यक्तीची चिंता देखील व्हावी लागते. तुकाराम महाराज म्हणतात, देवा त्याप्रमाणे तुम्ही सर्व समर्थ आहात आणि आम्ही तुमचे बाळ आहोत लेकरे आहोत जर तुम्हाला उचित वाटत असेल तर माझ्या सारख्या पतिताला तुम्ही कृपा करुन तारा.