1923.
देवा आता ऐसा करी उपकार । देहेचा विसर पाडी मज ॥१॥
तरींच हा जीव सुख पावे माझा । बरे केशीराजा कळो आले ॥धृपद॥
ठाव देई चित्ता राख पायापाशी । सकळ वृत्तींसी अखंडित ॥२॥
आस भय आता लाज काम क्रोध । तोडावा संबंध यांचा माझा ॥३॥
मागणे ते एक हेचि आहे आता । नाम मुखी संतसंग देई ॥४॥
तुका म्हणे नको वरपंग देवा । घेई माझी सेवा भावशुद्ध ॥५॥

अर्थ :
देवा तु आता माझ्यावर असा उपकार कर कि या देहाचा विसर मला पाडून माझा देह भाव नाहीसा कर. त्यामुळे हे केशी राजा माझ्या जीवाला सुख प्राप्त होईल हे मला समजले आहे. देवा तु माझ्या चित्ताला आणि सर्व वृत्तींना अखंडितपणे तुझ्या पायाजवळ स्थान द्यावे आणि त्यांची राखण करावी. देवा अशा, भय, चिंता, लाज, काम क्रोध यांच्याशी माझा संबंध तोडून टाकावा. देवा आता माझे मागणे एकच आहे ते म्हणजे हे की तू माझ्या मुखामध्ये सतत तुझे नाम राहू द्यावा आणि संत संग घडू द्यावा. तुकाराम महाराज म्हणतात देवा मी केवळ बाह्य रंगाने वरवर दाखवण्याकरता तुमची केलेली सेवा तुम्ही घेऊ नका तर जी सेवा मी शुद्ध भक्तिभावाने केलेली आहे तीच तुम्ही सेवा घ्यावी.