2762.
आम्ही पाहा कैसी एकतत्त्वी झालो । राखणे लागलो वासनेसी ॥१॥
तुम्हाविण काही नावडावे या जीवा । केला तोचि देवा दृढ पण ॥धृपद॥
वर्म नेणो परि वृत्ती भंगो नेदु । वंदिलेंचि वंदू आवडीने ॥२॥
तुका म्हणे कले नामाचे जीवन । वारताही भिन्न नेणो आता ॥३॥

अर्थ :
देवा आम्ही तुमची भक्ती करावी अशी आमची वासना आहे व त्या वासनेचे आम्ही रक्षण करत आहोत पाहा आम्ही कसे एकत्रित झालो आहोत. देवा तुमचेवाचून या जीवाला काहीही आवडू नये असाच आम्ही दृढपण केला आहे. देवा आम्हाला तुझे वर्म कळत नाही परंतू आमची तुझ्याविषयी एकनिष्ठ वृत्ती जी आहे ती आम्ही पागू देणार नाही आणि जे वंदय आहेत त्यांना आम्ही आवडीने वंदन करु. तुकाराम महाराज म्हणतात, देवा तुझ्या नामालाच आम्ही आमचे जीवन केले आहे त्यावाचून इतर कोणतीही वार्ता आम्ही ऐकणार नाहीत.