128.
कर्म करी देही धरूनी फलाशा ।
द्वैताचा वळसा जयापाशी ॥१॥
तयासी हा जाण प्राप्त मृत्युलोक ।
रजोगुणी एक वोळखावा ॥२॥
गर्व जयापाशी क्रोध सर्वकाळ ।
निद्रा ते जवळ ठेविलीसे ॥३॥
मोहाची साखळी सर्वकाळ कंठी ।
परस्त्रिया दृष्टी न्याहाळकु ॥४॥
आलियाने घरा इंद्राची संपत्ती ।
समाधान चित्ती नाही जया ॥५॥
पापिया निष्ठुर विषयांचा ध्यास ।
जया अविश्वास सर्वकाळ ॥६॥
चुंबक निंदक भूतमात्री द्रोहो ।
नाही निःसंदेहो चित्त ज्याचे ॥७॥
बहेणि म्हणे ऐसा वर्ते जो मानसी ।
मृत्युलोकी त्यासी देह घेणे ॥८॥