1237.
भक्त स्तवने जे जे करिती ।
ते जे ऐकोनिया श्रीपती ।
सुखे संतोषोनिया चित्ती ।
दासा देती वरदाने ॥१॥
ध्रुवाने वनी आराधिला ।
तैसाचि उपमन्ये स्तविला ।
एक तो अढळपदी स्थपिला ।
एका दिधला क्षीरसिंधु ॥२॥
प्रल्हादाचे स्तवन गोड ।
त्याचे पुरवी अवघेचि कोड ।
अग्निविषाचे सांकड ।
नेदी पडो शस्त्राचे ॥३॥
द्रौपदीने स्तविताचि तातडी ।
नेसती झाला तिची लुगडी ।
कौरवे लाजविली बापुडी ।
अंगुष्ट तोही दिसो नेदी ॥४॥
गजेंद्राचिया स्तवनासाठी ।
धावे वैकुंठीहुनी उठाउठी ।
निजकरे घालूनिया मिठी ।
सोडवी संकटी स्वामी माझा ॥५॥
रुक्मिणीचे प्राणिग्रहण ।
करी ऐकोनिया तिचे स्तवन ।
पांचाळिये हातीचे भाजीपान ।
करी भोजन स्तवने तिच्या ॥६॥
निळा म्हणे कृपामूर्ति ।
अपार भक्ताचिये स्तुती ।
ऐकोनिया तोषलेती ।
मी ही बाळमती विनवितो ॥७॥