3358.
गंगा गेली सिंधुपाशी । जरी तो ठाव नेदी तिशी ॥१॥
तिणे जावे कवण्या ठाया । मज सांगा पंढरिराया ॥धृपद॥
जळ क्षोभले जलचरा । माता बाळा नेदी थारा ॥२॥
तुका म्हणे आलो शरण । देवा त्वा का धरिले मौन ॥३॥

अर्थ :
गंगा समुद्राजवळ गेली आणि समुद्राने तिला तेथे स्थानच दिले नाही तर, मग तिने कोठे जावे हे पंढरीराया आता तुम्हीच हे मला सांगा ? पाणी जळचरांवर चिडले आणि मातेने बाळाला थाराच दिला नाही तर. तुकाराम महाराज म्हणतात, देवा मी तुम्हाला शरण आलो आता तुमच्यावाचून मी दुसरे कोठे जावे मी तुमच्याजवळ आलो आणि तुम्ही असे मौन का धरले आहे देवा सांगा.