2730.
आता मी पतित ऐसा साच भावे । कळो अनुभवे आले देवा ॥१॥
काय करावे ते रोकडेंचि करी । राहिली हे उरी नाही दोघा ॥धृपद॥
येर येरा दृष्टी द्यावे या उत्तरा । यासी काय करा ग्वाही आता ॥२॥
तुका म्हणे मेलो सांगता सांगता । तेचि आले आता कळो तुम्हा ॥३॥

अर्थ :
देवा मी खरोखरच पतित आहे असे मला अनुभवावरुनच कळून आले आहे. देवा आता तुम्हाला काय करायचे असेल ते खुशाल करा कारण आपल्या दोघामध्ये आता संकोच राहिला नाही. देवा आता आपण एकमेकांसमोर उभे असून आपण एकमेकांस बोलण्यासही तयार आहोत मग येथे तिस-या साक्षीदाराची काय गरज आहे ? तुकाराम महाराज म्हणतात, देवा जी गोष्ट मी सांगता सांगता मेलो ती गोष्ट आता तुम्हाला कळून आली आहे.