2892.
करावा वर्षाव । तृषाक्रांत झाला जीव ॥१॥
पाहे आकाशाची वास । जाणता तू जगदिश ॥धृपद॥
संयोगे विस्तार । वाढी लागे तो अंकूर ॥२॥
तुका म्हणे फळे । चरणांबुजे ते सकळ ॥३॥

अर्थ :
देवा तुमच्या कृपेचा तुमच्या प्रेमाचा वर्षाव माझ्यावर करा कारण माझा जीव फार तृष्णांकित झाला आहे. देवा तू आकाशाचेच स्वरुप आहेस त्यामुळे मी आकाशाकडे आशा देऊन पाहात आहे. मोठया आशेने आकाशाकडे पाहात आहे. हे जगदीशा तू सर्व काही जाणतो आहेस. हे जगदीशा तुझ्या कृपाजलाचा जर संयोग झाला तर माझ्या अंत:करणातील ज्ञानांकुराचा वाढ होऊ लागतो आणि ते विस्तार पावु लागतात. तुकाराम महाराज म्हणतात, देवा तुमचे चरण म्हणजे माझ्यासाठी सर्व प्रकारचे फळच आहे.