2462.
रिकामे तू नको मना । राहो क्षणक्षणा ही ॥१॥
वेळोवेळा पारायण । नारायण हे करी ॥धृपद॥
भ्रमणांच्या मोडी वाटा । न भरे फाटा आडराने ॥२॥
तुका म्हणे माझ्या जीवे । हे चि घ्यावे धणीवरी ॥३॥

अर्थ :
हे मना तु क्षणभरदेखील रिकामा राहू नको. वेळोवेळी तु नारायणाचेच पारायण म्हणजे चिंतन करत राहा. भ्रमाच्या वाटा तु मोडून टाक आणि इतर निषिद्ध कर्माच्या आडरानात जाण्यासाठी मनात संकल्पना भरू नकोस. तुकाराम महाराज म्हणतात आता हयाच सर्व गोष्टी मी माझ्या मनाला समजावल्या आहेत व नारायणाचे चिंतन तृप्त होईपर्यंत मी घेत आहे.