1644.
ऐका पंडितजन । तुमचे वंदितो चरण ॥१॥
नका करू नरस्तुति । माझी परिसा हे विनंती ॥धृपद॥
अन्न आच्छादन । हे तो प्रारब्धा अधीन ॥२॥
तुका म्हणे वाणी । सुखे वेचा नारायणी ॥३॥

अर्थ :
हे पंडित जनहो मी तुम्हाला जे काही सांगत आहे ते तुम्ही ऐका. आहो तुम्ही धनासाठी किंवा मान पानासाठी नरस्तुती करू नका एवढी विनंती माझी तुम्ही ऐका. अन्न आणि वस्त्र हे प्रारब्धाच्या अधीन आहे. तुकाराम महाराज म्हणतात अहो तुम्ही तुमची वाणी नारायणाची स्तुती करण्याकरिता करा, त्याने तुम्हाला सुख प्राप्त होईल.