1643.
पंडित तोचि एक भला । नित्य भजे जो विठ्ठला ॥१॥
अवघे सम ब्रम्ह पाहे । सर्वा भूती विठ्ठल आहे ॥धृपद॥
रिता नाही कोणी ठाव । सर्वा भूती वासुदेव ॥२॥
तुका म्हणे तोचि दास । त्या देखिल्या जाती दोष ॥३॥

अर्थ :
जो विठ्ठलाला नित्य भजतो त्यालाच खरे पंडित म्हणावे. सर्वत्र ब्रम्‍ह समान आहे आणि सर्व काही विठ्ठल आहे असे तो नेहमी पाहतो. विश्वातील कोणतीही जागा रिकामी नसून तेथे विठ्ठल आहे आणि सर्व भूतमात्रा मध्ये वासुदेव आहे असे त्याला वाटत असते. तुकाराम महाराज म्हणतात तोच खरा हरीचा दास आहे आणि त्याला नुसते पाहिले तरी सर्व दोषाची निवृत्ती होते.