707.
आह्मी याची केली सांडी । कोठे तोंडी लागावे ॥१॥
आहे तैसा असो आता । चिंते चिंता वाढते ॥धृपद॥
बोलिल्याचा मानी सीण । भिन्न भिन्न राहावे ॥२॥
तुका म्हणे आम्हापाशी । धीराऐसी जतन ॥३॥

अर्थ :
तू आमच्या कडे लक्ष देत नाहीस त्यामुळे आम्ही तुझ्याशी संबंध तोडले आहे कुठे तुझ्या तोंडी लागावे ? आता देव आहे तसा असेल त्याच्या विषयी चिंता केल्याने चिंता वाढत जाईल त्यामुळे चिंता करणे सोडून दिले आहे. आम्ही जे काही देवाला बोलतो त्याचा त्रास होतो, त्यामुळे आपण दोघानी भिन्न भिन्न राहावे हे बरे आहे. तुकाराम महाराज म्हणतात हे देवा तू आमच्याशी कसाही वागलास तरी आम्ही तुझी भक्ती सोडणार नाही.