2407.
दहयाचिया अंगी निघे ताक लोणी । एका मोले दोन्ही मागो नये ॥१॥
आकाशाचे पोटी चंद्र तारांगणे । दोहींशी समान पाहो नये ॥धृपद॥
पृथ्वीचा पोटी हिरा गारगोटी । दोहोसी समसाटी करू नये ॥२॥
तुका म्हणे तैसे संत आणि जन । दोहींसी समान भजू नये ॥३॥

अर्थ :
दह्याच्या अंगातून ताक आणि लोणी हे दोन्ही निघते परंतु दोघानाही एकाच मोलाने मागू नये. आकाशाच्या पोटामध्ये चंद्र आणि तारे आहेत परंतु दोघानाही एक सारखे पाहू नये. एकाच पृथ्वीच्या पोटात हिराही असतो आणि गारगोटी ही असतात परंतु दोघाचीही किंमत सारखी करून आदलाबदली कोणीही करू नये. तुकाराम महाराज म्हणतात अगदी त्याप्रमाणे संतांना जसे भजतो तसे सामान्य लोकांना भजू नये.