413.
तीर्था तीर्थाराव ती एक पंढरी ।
पाहता पृथ्वीवरी आणिक नाही ॥१॥
धन्य ते दैवाचे घेती प्रेमसुख ।
सदा नामघोष मुखी वसे ॥२॥
भीमा चंद्रभागा दोहींचा संगम ।
नांदे मेघश्याम पांडुरंग ॥३॥
पुण्य पुष्पावती तीरी वेणुनाद ।
सप्रेम गोविंद क्रीडा करी ॥४॥
बैसोनि विमानी येती देव तिन्ही ।
काळ हा साधुनी माध्यान्निके ॥५॥
ब्रह्मत्रय-क्षेत्र पंढरी-पाटण ।
म्हणोनी श्रेष्ठ जाण बहुता गुणे ॥६॥
कर्मब्रह्म काशी नामब्रह्म पंढरी ।
सर्वब्रह्मगिरी खलुविद ॥७॥
पंढरीमाझारी ब्रह्मत्रयवास ।
म्हणोन विशेष पंढरी हे ॥८॥
बहेणि म्हणे पंढरीं सर्वांही वरिष्ठ ।
ऐशा श्रुती स्पष्ट बोलताती ॥९॥