3995.
उठा सकळ जन उठिले नारायण । आनंदले मुनिजन तिन्ही लोक ॥१॥
करा जयजयकार वाद्यांचे गजर । मृदंग विणे अपार टाळ घोळ ॥धृपद॥
जोडोनि दोन्ही कर मुख पाहा सादर । पायावरी शिर ठेवूनिया ॥२॥
तुका म्हणे काय पढियते ते मागा । आपुलाले सांगा सुख दुःख ॥३॥

अर्थ :
आता सर्वांनी उठून उभे राहा कारण नारायण उठले आहेत व त्यामुळे सर्व मुनीजण आणि तीनही लोक आनंदले आहेत. अपार टाळ, मृदुंग वादयांचा गजर करा व हरीनामाचा जयजयकार करुन हरिच्या नामाचा घोष करा हरीच्या पायावर आपले शीर ठेवून आपले दोन्ही कर जोडून हरीचे मुख सादरपणे पाहा. तुकाराम महाराज म्हणतात, तुम्हाला काय हवे असेल ते सर्व देवाला मागा आणि तुमचे सर्व सुख, दु:ख देवाला सांगा.