191.
श्रीकृष्ण चाणूर बलराम मुष्टिक यांचे मल्लयुद्ध

चौदा भुवने वसे ज्याचे पोटी । त्यासी आणी जेठी मारावया ॥१॥
इंद्रादि सुरवर जयाचे किंकर । त्यासी आणी पामर झोंबीसाठी ॥२॥
अतुर्बळी तेव्हा दिसे नारायण । जळताती मने वैरियांची ॥३॥
कंसाचे अंगणी उभा असे देव । जैसा ज्याचा भाव तैसा भासे ॥४॥
कृष्णाते देखोनी वल्गना करिती । चोळिताती माती दंडालागी ॥५॥
बळिभद्रासी खूण दावियेली तेव्हा । उशीर न लावा मारायासी ॥६॥
नामा म्हणे एक उरला असे कंस । वधती सकळांस दोघेजण ॥७॥