590.
तुजचि पासाव जालोसे निर्माण । असावे ते भिन्न कासयाने ॥१॥
पाहावा जी ठायी करूनि विचार । न्यून कोठे फार असेचि ना ॥धृपद॥
ठेविलिये ठायी आज्ञेचे पाळण । करूनि जतन राहिलेसे ॥२॥
तुका म्हणे आता बोलतसे स्पष्ट । जालो क्रियानष्ट तुह्मा ऐसा ॥३॥

अर्थ :
तुझ्याच पासून आम्हा सर्वाची उत्पत्ती झाली. तुम्हाला सोडून आम्ही वेगळे कसे राहू ? तुम्हीच याचा विचार आपल्या मनाशी करून पाहवा. माझ्यात आणि तुमच्यात काही कमी असे नाहीच. तुम्ही मला जशी आज्ञा केली आहे त्याप्रमाणे तुम्ही ठेवले आहे त्या ठिकाणी मी राहिलो आहे व तुमच्या आज्ञेचे पालन केले आहे. तुकाराम महाराज म्हणतात देवा मी आता एकदम स्पष्ट बोलतो आम्ही देखील तुमच्या सारखेच क्रियानष्ट झालो आहोत.