589.
निर्गुणाचे घ्यावे गुणासी दर्शन । एका एकी भिन्न भेद घडे ॥१॥
तुम्हा आम्हा आता न पडे यावरी । आहो तेचि बरी जेथे तेथे ॥धृपद॥
आपणापासुनी नसावे अंतर । वेचिले उत्तर म्हणउनि ॥२॥
तुका म्हणे अंगा आली कठिणता । आमच्या अनंता तुम्हा ऐसी ॥३॥

अर्थ :
निर्गुण असे तुझे रूप आहे. असे असता मी जेव्हा तुझे दर्शन घेऊ पाहतो तेव्हा त्यावेळी अद्वैत नाहीसे होते आणि व्दैत उत्पन्न होते. देवा आता यापुढे तुझ्या आणि माझे काही पटणार नाही कारण मला तू जसा आहेस तसाच आवडतोस. आपल्या पासून आम्ही वेगळे नसावे म्हणून आत्ता पर्यंत मी तुमची पुष्कळ विनवणी केली. तुकाराम महाराज म्हणतात पण तुम्ही मन कठोर केले आम्हाला वेगळे ठेवले मीही तुमच्या सारखे मन कठोर करतो.