748.
भक्त ऐसे जाणा जे देही उदास । गेले आशापाश निवारूनि ॥१॥
विषय तो त्यांचा जाला नारायण । नावडे जन धन माता पिता ॥धृपद॥
निर्वाणी गोविंद असे मागेपुढे । काहीच साकडे पडो नेदी ॥२॥
तुका म्हणे सत्य कर्मा व्हावे साह्य । घातलिया भय नरका जाणे ॥३॥

अर्थ :
जे देहा विषयी उदास आहेत तेच भक्त जाणावे. त्यांचि आशापाश निवारण झालेले आहे. त्यांचा विषय म्हणजे फक्त नारायण झालेला असतो. त्यांना या संसारातील जन, धन, सगे काहीच आवडत नाहि, अश्या भक्तांच्या मागे पुढे देंव त्यांचे सर्व कष्ट निवारण करण्या साठी उभा असतो. यांना तो कधी संकटात सापडू देत नाही. तुकाराम महाराज म्हणतात सत्य काम जे असेल त्याला सहकार्य करावे नाही तर जो कोणी सत्य कर्मात अडथळा आणतो त्याला नरकात जावे लागते.