2499.
खेळतो ते खेळ पायाच्या प्रसादे । नव्हती ही छंदे नासिवंत ॥१॥
माझा मायबाप उभा विटेवरी । कवतुके करी कृपादान ॥धृपद॥
प्रसादाची वाणी वदे ती उत्तरे । नाही मतांतरे जोडियेली ॥२॥
तुका म्हणे रस वाढितिया अंगे । छाया पांडुरंगे केली वरी ॥३॥

अर्थ :
मी जो काही अभंग करण्याचा खेळ खेळत आहे तो देवाच्या पायाच्या प्रसादानेच त्यामुळे मला जो छंद लागलेला आहे तो कधीही नाश पावणार नाही. माझा माय बाप विटेवर उभा आहे तो माझ्यावर कृपादान करून माझे कौतुक करत आहे. मी माझ्या वाणीने जे काही बोलत आहे ते देवाच्याच प्रसादा ने बोलत आहे त्यामध्ये इतर कोणाचेही मत किंवा मतांतरे मी जोडलेले नाही. तुकाराम महाराज म्हणतात मी जो अभंग रचनेचा खेळ खेळत आहे त्यामध्ये हरिभक्ती विषयी वाढता रस आपल्या शरीरामध्ये उत्पन्न होत राहतो कारण माझ्या वाणीवर पांडुरंगाने कृपेची छाया केली आहे.